Spilaklúbburinn Steingrímur

Gunnar Aron Ólason

2010-09-27T18:09:00.000Z

Gunnar Aron Ólason: "I connected Blogger to my http://flavors.me page - http://flavors.me/garon75"

Spilerí 18 FEB

2010-02-16T09:34:00.001Z

Jæja kútar,

Þá er komið að spilakveldi.

18 feb í móabarði 34.

Sjáumst þá

Skál

HH

Eru ekki allir í stuði

2008-01-17T10:47:00.000Z

Daginn Steingrímar og árið.

Er ekki kominn tími á smá spilaglens?

Einar ég fann hérna vísindalegar staðreyndir sem hjálpa þér til að anda léttar?

Sjá hér.

Þú ert því ekki einn í þessum vandræðum :o)

Skál

Himmz

Bara svona til gamans....

2007-11-30T10:29:00.000Z

Harðir Liverpool menn hér á ferðinni.

Gaman að rifja þetta upp, þarf ekki að fara að plana næstu ferð?

Spilakvöld - Scrabble Battle!

2007-10-22T14:12:00.000Z

Ég vann, Einar og Himmi töpuðu, hvað get ég sagt?

Spilerí ójé

2007-10-07T13:28:00.000Z

Sælir piltar, fyrirhugað er spilakveldi þann 11 okt, fimmtudag.

Mæting 20:15. Í Hafnarfjörðinn.

skál

Himmz

Áskorun

2007-08-31T08:59:00.003Z

Hér með skora ég á einhvern annan en mig, Einar eða Aron að halda spilakvöld.

Langþráðu spilakveldi Lokið!

2007-07-25T11:16:00.000Z

Sest var að spilerí í húsakynnum Einars Liðþjálfa þann 24.7.2007. Fyrstur á staðinn var Himmz Herforingi en fljótlega fylgdu í kjölfarið Páll Liðhlaupi og Garon Marskálkur. Veigarnar voru í dýrari kantinum að þessu sinni þar sem rúmlega 15 ár eru síðan síðasta spilakveld var haldið. Spilað var Risk afbrigðið Continent Hold ´em. Eitthvað voru menn ryðgaðir í reglum þessa leiks og tók þó nokkuð langan tíma að koma sér inní leikinn, sérstaklega þar sem menn töldu að hárnákvæm uppröðun plast hermanna á útjaðri spilaborðsins mundi skipta sköpum í baráttunni sem fram undan var! En í stuttu máli var það ekki það sem réði úrslitum, heldur gífurleg herkænska og hugvitssemi hins magnaða spilar Himmz Herforingja. Himmz fékk þá göfugu mission að útrýma sjálfum sér, sem ekki er vænlegt en sem aukamission varð hann að ná til sín 24 löndum sem hann ákvað að fylgja frekar eftir. Hinir meðlimir fengu þau verkefni að ná til sín hinum og þessum heimsálfum sem ég man nú ekki nákvæmleg hverjar voru hjá hverjum. En í stuttu máli gerðist þetta, allir nema Heimsherforinginn fóru full geyst af stað og murrkuðu líftóruna úr hver öðrum og þar af leiðandi sjálfum sér ásamt því að tapa sér í veitingum. Ýmis bandalög voru stofnuð til að klekkja á andstæðingum. Á tímabili voru þrír meðlimir klúbbsins orðnir sameinaðir gegn Herforingjanum. En þeir máttu sér lítils gegn hinni hrikalegu Fjólubláu útlendingahersveit sem rúllaði til sín 24 löndum á frekar stuttum tíma og tortímdi svörtum Hersauði Einars Liðþjálfa í leiðinni. Sem sagt Himmz Herforingi er sigurvegari kveldsins og bið ég meðlimi Steingríms að lúta höfði næst þegar þeir koma á fund þessa merka manns og ávarpa hann Heil Himmz héðan í frá.

Lifið heil, Skál

Himmz Herforingi, a.k.a.Forseti alheimsins og víðar.

Boðað til spilakvelds

2007-07-16T10:53:00.000Z

Ekki er hægt að segja að Steingrímur hafi verið mjög virkur undanfarna mánuði. Ég ætla nú að reyna að bæta aðeins úr því og boða til spilakvölds á heimili mínu, Svöluási 1b í Hafnarfirði fyrir þá sem ekkert vita. Þriðjudagurinn 24. júlí er sá dagur sem ég hef í huga, það má þó skoða betur ef ekki hentar. Spilað verður svokallað Continent Hold´em afbrigði af Risk.
Þar sem svo langt er um liðið síðan síðast var haldið spilakveld þá er ætlast til að menn leggi sérstakan metnað í þær veitingar sem komið verður með.

Að vangefnu tilefni

2007-04-02T22:58:00.000Z

Það er búið standa lengi til hjá mér að pósta hér inn eins og einum pistli. En eins og flestir þekkja getur það dregist ótrúlega að gera einföldustu hluti, en eins og segir í máltækinu þá verður engin kona skækja af eins manns völdum.

Þannig eru mál með vexti að ég hafði einhverntíma lýst yfir löngun minni að bjóða samSteingrímum mínum að koma í spilaklúbb hingað austur, en þið vitið kannski ekki að ég er fluttur austur fyrir fjall eða á Hellu nánar tiltekið. Sjá hér.

Nú er spurning hvort að áhugi sé á einu landsbyggðarspilakveldi? Dagsetning og tími dags væri eitthvað sem þyrfti að ræða í commentum. En eins og máltækið segir þá er vesæl sú mús sem hefur aðeins eitt hús.

Nú vil ég varpa fram ferskeytlu og býst við svari í bundnu máli frá hverjum og einum Steingrími, en hún hljóðar svo:

Að svífa yfir Heiðina,
tekur ca. 50 mín.
Til að seðja hungursneyðina,
með kók og appelsín?

Páll svarar:

Mig hræðir eigi heiðin sú,
þó það væru 100 mín.
En varðandi drykki spyr ég nú,
Fær maður ekkert brennivín?

Himmz svarar:

Spilakveldið ég stefni á
svífandi yfir leiti
Hella er pleisið Garon hjá
Haldið verður teiti,

Ef í boði er brennivín
bjór og meir af þeim toga
Þá þykir líklegt að fyllisvín
Þurfi úr sér að sofa,

Þá vandast muna til málið
menn vantar jú næturstað
Auðvelt er sopið kálið
ef Einar æki í hlað.

(báðar leiðir ;o)

Bara svona aðeins að lífga þetta við.

2007-03-18T19:21:00.000Z

Hér er hlekkur á nokkrar myndir frá Liverpoolferð þriggja Steingríma.

Til hamingju með Jólin!

2006-12-22T08:35:00.000Z

Steingrímur óskar börnum sínum gleðilegrar jólahátíðar!

Það held ég nú.

2006-11-12T20:43:00.000Z

Jæja piltar, eins og ég hef minnst á við ykkur stefni ég á að halda á heimili mínu síðbúna stofnhátíð Steingríms laugardaginn 2. desember, mat og almenna gleði.
Ég hef rætt þetta við alla meðlimi og hér geta menn síðan sett inn staðfestingu á komu sinni.

Athugið að einungis er hægt að staðfesta, afboðanir eru ekki teknar gildar.

Hilsen, formaðurinn.

Hátíðarstemmning

2006-10-21T12:06:00.000Z

Sælir piltar,

Ég vil byrja á að óska Gunnari Aroni, einum af yfirSteingrímunum fjórum til hamingju með frumburðinn sem kom í heiminn rétt fyrir miðnætti á mánudagskvöldið. Til lukku með það.

Í ljósi þessa verða dagsetningum fyrir síðbúna stofnhátíð(árshátíð) Spilaklúbbsins Steingríms sjálfsagt einhverja skorður settar. Ég sjálfur er sjálfsagt laus allar helgar og vil endilega fá ykkur kumpánana í heimsókn eitt föstudags- eða laugardagskvöld í svolítið karlakvöld.

Þá er bara að hefja pallborðsumræður um dagsetningar hér á þar til gerðu athugasemdasvæði.

Yfir og Út og Himmi minn gangi þínum mönnum vel á morgun, ég veit að þú óskar okkur þess sama.

Formaðurinn

Halda skulum kvöld spila ha já hmmm.

2006-09-28T12:12:00.000Z

Sælir piltar, umræða var komin af stað með að halda spilakvöld í næstu viku. Ég er meira en til í að halda það og láta reyna á nýja borðið sem löggilt spilaborð.

Við skulum nú hefja viðræður um dagsetningu.

Ég vil byrja á að stinga upp á mánudagskvöldi, heima hjá mér gegn hreinsun á mengun og yfirtöku á tveimur dísel pallbílum og 8 milljón kakkalökkum.

Hvað segið þið um það?

GLÍMA

2006-08-16T15:05:00.000Z

STÍGA !!!!!!

Sigtryggur Vann !

Nýtt nafn á Á.B.H. Járnbindingar

2006-06-23T08:59:00.000Z

Sælir bræður nær og fjær! Eins og sumir ykkar vita er ég orðinn næsthæstráðandi hjá honum Árna bróður mínum. Þar sem núverandi nafn fyrirtækisins, Á.B.H. Járnbindingar, er fremur óþjált þá stendur til að finna á það nýtt nafn. Ætla ég því að efna til samkeppni hér á þessum ágæta vef. Nafnið á helst ekki að vísa til starfssemi fyrirtækisins og lénið.is þarf að vera laust. Að sjálfsögðu þarf það að vera þjált og skiljast auðveldlega þegar maður segir það í síma þ.e. að maður þurfi ekki að endurtaka það þrisvar. Verðlaunin eru ekki af verri endanum. Ef þú kemur með nafn sem verður notað færðu kassa af dýrindisbjór og inneign upp á 100 kg af klipptu og beygðu járni.

Látið því hugann reika og finnið upp á einhverju sniðugu því til mikils er að vinna.

V for Vendetta II

2006-06-07T13:05:00.000Z

Jæja ég horfði á V for Vendetta í gær og verð að segja að hún var frábær svo ekki sé minna sagt. Þessi mynd er, hvernig á maður að orða það, tímabær. Það er kominn tími á að þenkjandi nútímafólk staldri við og velti eftirfarandi fyrir sér.

Erum við að skilja eftir betri heim fyrir börnin okkar en við fengum í hendurnar?

Getum við gert eitthvað til að bæta hann?

Getum við lifað með því að hafa ekki reynt?

Veltið þessu fyrir ykkur kæru bræður. Lifi Byltingin!

Ég legg til að 5. nóvember 2006 látum við eitthvað gott af okkur leiða, hvort sem það er að xxxxxxritskoðað af útsendara Stóra Bróðurxxxxxxx eða vinna sjálfboðavinnu eða hvað sem er. Vöknum áður en það er um seinan! Damn hvað þessi mynd kveikti í mér!

Lifið í lukku en ekki í krukku!

Til Þess Er Varðar.

2006-05-15T16:24:00.000Z

Til Hamingju með Bikarsigurinn

Steingrímar og aðrir PÚLLARAR.

En tæpt var það, magnaðasti leikur sem ég hef séð í langann tíma.

Skál!

V for Vendetta

2006-05-07T06:55:00.000Z

Ef þið eruð ekki búnir að sjá hana druslist þá í bíó. Besta mynd sem ég hef séð í mörg ár og boðskapurinn á erindi við alla hugsandi menn.

Krummi krunkar úti

2006-04-24T11:05:00.001Z

Maður pælir ekki mikið í textum við lög sem maður lærði þegar maður var lítill. Maður kann þá bara og þylur þá upp án þess að hugsa um hvað þeir eru. Tek sem dæmi lagið góðkunna Krummi krunkar úti (skrifa textann hér með fyrir þá sem ekki kunna).

Krummi krunkar úti
kallar á nafna sinn
ég fann höfuð af hrúti
hrygg og gæru skinn

komdu nú og kroppaðu með mér
krummi nafni minn
komdu nú og kroppaðu með mér
krummi nafni minn

Þegar maður syngur þetta hugsar maður, þetta er greinilega góður hrafn, deilir matnum með vini sínum.
En þegar maður reynir að sjá þetta fyrir sér þá eru þetta í raun bara tvær hræætur að éta dauða úldna kind. Lyktin þar að auki örugglega ógeðsleg.

Ótrauður Sauður

2006-04-05T13:56:00.000Z

Margir nota orðtakið "að halda ótrauður áfram". Það þýðir alltsvo að láta ekkert stoppa sig eða að halda einhverju áfram án þess að láta trufla sig eða eitthvað í þá áttina. En ef maður gerir eitthvað með hálfum hug og gefst upp við minnsta mótlæti er maður þá "að halda trauður áfram", er maður þá trauður sauður?

Pæling!

Lyfta?

2006-03-24T17:00:00.000Z

Orðapælingar eru göfug íþrótt og aðeins á færi fluggáfaðra manna eða ofurgáfaðra apa.

Enska orðið fyrir lyftu er elevator. Elevator er greinilega komið af sögninni elevate sem þýðir að hækka/fara hækkandi. En hvernig er það þá ef maður er að fara ofaní námu sem liggur langt undir yfirborði jarðar væri maður þá ekki í raun að nota descendinator í stað elevator þar sem maður er að fara niður en ekki upp. Að taka síganda í raun.

Pæling!

Skemmtilegt

2006-02-15T08:49:00.000Z

Þar sem það segir enginn neitt hér ákvað ég að segja eitthvað. Mér finnst staða Arsenal núna ansi merkileg. Þeim gengur mjög vel í meistaradeildinni en á sama tíma eru þeir í fimmta sæti í deildinni. Í fjórða sætinu er þeirra helsti nágrennisandstæðingur Tottenham. Þegar Tottenham tapar stigum og gefur Arsenal séns á að minnka muninn þá klikkar Arsenal á því.

Minnir þetta einhvern á Liverpool í fyrra. Ég er því að íhuga að spá því að Arsenal verði Evrópumeistari í vor.

2006-01-27T10:22:00.000Z

Manchester United 1

Liverpool 0

HA HA!

Gífurlegur léttir

2006-01-19T07:54:00.000Z

Einar er byrjaður aftur í ræktinni. Vil þó taka það fram að eftir veikindi mín fyrr í vetur þar sem ég léttist um ein 5 kg hef ég haldið mér í hóflegri fjarlægð frá þriggja stafa tölunum. Á mánudaginn mætti ég galvaskur í Íþróttahús Háskóla Íslands. Byrjaði ég á að vikta mig og færði mig svo yfir á klósettsvæðið. Þar kúkaði ég sem mest ég mátti í um 10 mínútur. Fyrst ég hafði viktað mig áður en klósettferðin hófst og hægðirnar voru í meira lagi þá fannst mér það hafa ákveðið menntunargildi að kanna hversu mikið ég hefði lést við aðfarirnar. Viti menn, þegar ég steig aftur á viktina var ég hálfu kílói léttari en áður. Það er heilmikill kúkur.

Mig langaði bara svona að deila þessu með ykkur.

Afsökunarbeiðni - Yfirbót

2005-12-30T10:22:00.000Z

Afsakið félagar Steingrímar. Ég var bara ekki með á nótunum, feilnóta í 12. sinfóníu Garons, ópus 29. Landhornaflakk setti strik í reikninginn ásamt almennri viðutanmennsku.

Ég stefni á að halda spilakvöld 2., 3. eða 4. jan til að reyna að endurheimta virðingu félaganna. Þetta mun verða viðhafnarspilakvöld svokallað. Formaðurinn heldur ræðu. Litríkur fatnaður stranglega bannaður, aðeins svart og hvítt leyft. Einnig er mælt með því að menn noti ermahnappa ef kostur er, hvort sem þeir eru í skyrtu eða ekki. Þeir sem mæta í hnésokkum mega búast við að verða vísað út. Fimmaurabrandarar skulu notaðir í hófi. Ef reglur eru eitthvað óljósar skal vísað í reglugerð um breytingu á reglugerð nr. 993/2004 um framkvæmd samnings um alþjóðaverslun með tegundir villtra dýra og plantna sem eru í útrýmingarhættu. Um brot á reglum þessum fer eftir hegningarlögum, lögum um meðferð opinberra mála, lögum um framkvæmd samnings um bann við notkun, birgðasöfnun, framleiðslu og flutningi jarðsprengna gegn liðsafla og um eyðingu þeirra og öðrum landslögum, eftir því sem við á.

Óskað er eftir tillögum að nákvæmari dagsetingu af þessum þremur sem í boði eru, einnig er óskað eftir almennum umræðum um komandi spilakvöld og nánari framkvæmd þess.

2005-12-27T13:07:00.000Z

Merry fucking Christmas !!!!!!!!!!!

Spádómskakan GÓÐA

2005-12-06T17:46:00.000Z

Ég ákvað að kíkja á Spádómsvélina hans Garons og viti menn VOLA

Your Fortune Is

Support bacteria -- it's the only culture some people have!

The Wacky Fortune Cookie Generator

Þessi dómur gæti ekki verið meira viðeigandi,
ef hann væri meira viðeigandi þá væri það alls ekki viðeigandi! Hmm.
Sem sagt ljúfar stundir framundan og ekki langt undan sýnist mér þó nærsýnn c.
En eitthvað grunar mig nú að Garon hafi komið nálægt smíði þessararar spádómsvélar.
Enda skilst mér að maðurinn liggi þessa dagana yfir dómum og lögum og því ekki ekki að deila því með sótsvörtum almúganum, þ.e. dómunum og já jafnvel breyta þeim í spádóma.
Einnig læðist að mér sá grágrímugi grunur að Einar verkfræðingur tilvonandi hafi einnig tekið þátt í smíðinni á kökuspávél þessari. Sá kappi er einmitt að lesa byggingaverkfræði þessa dagana en þar sem hann er nú ekki enn orðinn fullgildur verkfræðingur vill ég benda á að öll vélasmíði af þessu tagi er varhugaverð þar til að algjörri sérfræðikunnáttu um slíka smíði er náð, og er því háð. Myrk í máli tel ég hinsvegar ekki hafa komið nálægt þessari tækjaframleiðslu en þó tel ég víst að eftir spádóma frá slíkri spádóma spuna vél þurfi einstaklingur sem spádóminn hlýtur mjög líkega, í algjöru framhaldi af dómnum, á brýnni sálfræðihjálp að halda. En sá myrkmálugi er einmitt að æfa slíka viðlaga hjálp í baugslandi um þessar mundir og er því framtíð hans björt, á þeim vettvangi, með tilkomu þessarar hrákasmíðar þeirra Garons og Einars.

Þessi pistill felur í sér ákaflega mikilvægan boðskap

Ekki er ráðlagt að drekka í vinnunni, sérstaklega ef þú hefur aðgang að TÖLVU!

SKál í vinnunni.

Spákaka

2005-12-05T18:24:00.000Z

Ég fann spákökuvél á Netinu, fékk þetta...

Your Fortune Is

Man who scratch ass should not bite fingernails.

The Wacky Fortune Cookie Generator

Spennandi tímar...

Jólahlaðborð

2005-11-28T20:12:00.000Z

Ég og frúin fórum á föstudaginn á jólahlaðborð í boði KB-Banka. Það var haldið á Hótel Glym í Hvalfirði. Afar snoturt lítið hótel. Við áttum að koma með pakka á mann sem átti að gefa í pakkaleik. Sjöfn keypti sleipiefni og smokka og vakti það mikla kátínu þeirra sem fengu. Aðalskemmtun kvöldsins fólst þó í því að fylgjast með starfsfólki hótelsins sem var hvert öðru skrítnara. Þjónninn virtist ekki vera vel að sér í vínmálum því hann sá ekki muninn á hvítvíni og bjór og helti góðum hvítvínsslurk út í bjórinn hjá Sjöfn. Síðan sneri hann sér að næsta manni og ætlaði að hella rauðvíni út í kókið hjá honum.
Þaðan sem við sátum sást inn í eldhúsið þar sem tveir töffarar voru að vaska upp. Annar leit út fyrir að vera Rambó sem var búinn að fá nóg af málaliðinu. Hann hefur verið svona sextugur frekar stæltur í svörtum hlírabol með tattú á öxlinni. Hárið silfurgrátt og svaðalegur donut á andlitinu.
Meiri athygli vakti þó félagi hans því þegar ég sá hann fannst mér ég vera komin ein tólf ár aftur í tímann það er þegar ég sá hann Palla minn í fyrsta skipti. Drengurinn var Páll Guðbrandsson ársins 1993. Rauðhærður, slánalegur með risastór gleraugu og umfram allt alveg sérdeilis nördalegur. Já það er satt, Palli var einu sinni nörd. Þeir sem þekkja þennan geðþekka töffara í dag eiga eflaust erfitt með að kyngja þessu en svona var þetta.
Ein kokkan var einnig skemmtilega klædd til fótanna. Hún var þessum líka fína kokkagalla, stífpressaðri skyrtu og svörtum buxum. Við þetta var hún svo í skærbleikum plastklossum sem gersamlega æptu á mann.
Svo var þarna kvenþjónn um fertugt sem var örugglega uppgjafarstrippari. Hún var i fáranlega háhæluðum skóm og netasokkabuxum. Aflitaða hárið sem náði niður á rass var þrætt í gegnum einhvern gilltan rörbút, eitthvað svona sem Mel C hefði getað notað.
Maturinn var líka mjög góður!

Kárahnúkaferð

2005-10-16T11:40:00.000Z

Ég fór í ferð upp að Kárahnjúkum um helgina. Var búinn að skrifa langan og sérdeilis skemmtilegan pistil. ´Smellti svo á "Publish post" en þá komu skilaboðin "This page can not be displayed" og pistillinn horfinn. Kannski tek ég mig til og endurskrifa hann einhvern tíma seinna.

Engin nótt er svo dimm að ekki komi dagur á eftir

2005-10-06T11:09:00.000Z

"Já það hefur verið löng leiðin á toppinn fyrir Pál Guðbrandsson. Þrátt fyrir að vera stofnfélagi og æviráðinn formaður Spilaklúbbsins Steingríms hefur mér sóst erfiðlega að öðlast virðingu félaganna. Lánið lék ekki við mig í sumar og þrátt fyrir skemmtilegan sóknarleik tókst mér ekki að hafa sigur á einu einasta spilakvöldi í sumar. Þar sem aðrir menn hefðu fengið hughreystingu og hvatningu fékk ég ekkert annað en háð og spott, auk þess sem kappssemi mín var túlkuð sem einhvers konar "tapsæri". Hver hefur ekki lent í því að hrista tengingana aðeins of duglega þannig að þeir fljúgi óvart úr greipum manns í átt að öðrum spilurum, ég bara spyr!

Það var aðeins eitt til ráða, ef lafði lukka neitaði að ganga mér á hönd yrði ég að slípa hæfni mína þar til hún yrði hárbeitt, þá yrði sigurinn minn. Ég hafði í gegnum belgískan pennavin minn, Flaurent Claasens komist á snoður um evrópskan Risk klúbb, skipaðan elítu evrópskra Riskspilara. Allir voru meðlimir klúbbsins fyrrverandi stórmeistarar og höfðu hlotið 5000 Lego stig eða meira á mótum ERA (European Risk Association). Flaurent Claasens kom mér í samband við Henning Kaj Albrechtsen, fimmfaldan Danmerkur meistara og bronsverðlaunahafa í Risk á Smáþjóðaleikunum 1983 en þá hafði hann lúxembúrgskt vegabréf. Þar kynntust hann og Flaurent Claasens einmitt en það er önnur saga sem verður að bíða betri tíma.

Flaurent Claasens, heiðursmaður og einn fremsti árulesari Belga í dag.

Í byrjun ágúst hélt ég til Danmerkur og með meðmælabréfi frá Flaurent Claasens tókst mér að komast á eitt af Risknámskeiðum herra Albrechtsens, en hann tekur aðeins að sér að kenna 3 nemendum í senn og aðeins þrjú tveggja mánaða námskeið á ári enda er hann orðinn 84 ára gamall. Ég get því miður ekkert sagt um námskeiðið þar sem ég skrifaði undir þagnareið og á yfir höfði mér málsókn ef ég tjái mig um innihald og kennslu á námskeiði herra Albrechtsens. Ég get þó sagt það að maðurinn er snillingur sem á engann sinn líka og skipar sér á sess með Stephen Hawkings, Bobby Fischer og Bobby McFerrin.

Albrecthsen á hátindi ferils síns á Smáþjóðaleikunum í Túrkmenistan 1983.

Námskeiðið er búið, ég er kominn til Íslands, spilakvöld hefur verið boðað. Allt er til staðar til að ég geti látið til skarar skríða og fengið langþráða hefnd mína og heimtað þá virðingu sem ég á skilið."

(Hefnd hins réttláta, 2005, e. Pál Guðbrandsson, útg. Mál og Menning)

Sunnudagurinn 2. október verður lengi í minnum hafður. Spilaklúbburinn Steingrímur hafði legið í dvala síðan ég hélt út á vit nýrra spilakvölda í Danaveldi, drengirnir höfðu aðeins haldið eitt spilakvöld eftir að þeirra ástkæri formaður yfirgaf klakann. Þar sem ég var nú aftur kominn heim var splæst í eitt spilakvöld. Hist var heima hjá Hilmari og var sá mikli heiðursmaður Hilmar eldri verndari og siðgæðisvörður kvöldsins. Maður kemur aldrei að tómum kofanum í Neshömrum 4 né að tómum borðunum þar, Hilmar bauð uppá guðaveigar og gos, fullt af nammi og galdraði fram poppskál fyrir Einar sem má ekki borða nammi sökum offituvandamáls síns. Allir voru mættir, spilaborðið lagt út og leikar hófust.

Ég fékk það göfuga verkefni að útrýma herjum Arons og Aroni sjálfum.

Eftir að hafa fryst þá herkænskuaðferð(e. strategy) í nokkurn tíma ákvað ég að setjast að í Ástralíu og byrjaði ég á að sigra Eyjaálfuna nokkuð örugglega og var ekki hreyft við herjum mínum þar það sem eftir lifði spils og fékk ég því alltaf að minnsta kosti 5 hermenn í upphafi hverrar umferðar. Hilmar hreiðraði um sig í Afríku og reyndi með veikum mætti að teygja sig upp til Evrópu og þótti með hreiðurgerð sinni í Afríku vera líklegur mjög og sterkur á velli. Einar var með aðgerðir í Norður- og SuðurAmeríku og Aron var með skærur hér og þar. Þar fór svo þannig að Aron leysti úr læðingi sannkallað leifturstríð gegn Einari að hætti Þjóðverja. Það mátti ljóst vera að Aron ætlaði sér að útrýma Einari og gekk það ágætlega nema að hann ofmat hernaðarstyrk sinn lítillega og hafði það ekki af að eyða Einari og skyldi eftir ansi strjálan herafla. Einar lifði árásina af og þegar hann var búinn að jafna sig tók við miskunnarlaus og grimmileg hefnd. Aron átti aldrei möguleika og murkaði Einar lífið úr hermönnum Arons og voru þeir margir hverjir skotnir í bakið á flóttanum. Eftir helför Einars höfðu markmið mín breyst, þar sem ég gat ekki lengur eytt Aroni var markmið mitt nú að ná 24 löndum. Einari fannst Hilmar orðinn of sterkur og stakk upp á samvinnu. Ég tók fálega í það og lét líta út fyrir að ég væri að einbeita mér að einhverjum óræðum álfusigurförum. Með þessu herbragði mínu tókst mér að halda markmiðum mínum leyndum og bruggaði ég launráð mín í friði og ró meðan Einar reyndi að halda aftur af vexti Hilmars. Síðan gerðist það. Ég safnaði upp myndarlegum her og hélt af stað. Löndin féllu eitt af öðru og fóru bylgjur sigra minna eins og höggbylgja atómsprengju yfir heiminn. Þetta var keðjuverkun sem ekki varð stöðvuð og innan skamms var sigur minn orðinn að veruleika, fyrsti sigur minn á Spilakvöldum Spilaklúbbsins Steingríms (The Dengsa Tour). Önnur eins herkænska hefur ekki sést og eru þeir félagar Einar og Hilmar sjálfsagt enn að klóra sér í hausnum. En svona mikilfenglegur sigur kallar á mikilfenglegan pistil og hér er hann kominn.

Nú halda drengirnir á Íslandi sjálfsagt spilakvöld tvisvar í viku til að eiga roð í mig þegar ég sný aftur um jólin og þá munu þau tíðkast breiðu spjótin.

Ég kveð að sinni, lifið heil.

Einar XRW

2005-09-29T13:19:00.000Z

Já þá er það staðfest, Einar kominn í átak og hef ég tekið að mér að koma garpnum í flott form.
En Einar hefur æft stíft seinustu 2 vikur undir gjöfulli leiðsögn minni og það kom berlega í ljós í gær að árangurinn lét ekki á sér standa. En í gærkveldi mætti Einar XRW í fyrsta sinn í Taek kwon do tíma ásamt smá lyftingar sessioni og viti menn, sláandi niðurstöður kappinn hafði misst HEILT KÍLÓ eftir spriklið. Spurning hvort um vökvatap var að ræða skal ósagt látið. En þið sem þekkið Einar vitið að um stóran og sterkan strák er að ræða, það kom mér því skemmtilega á óvart hversu garpurinn var liðtækur í hinni fornri sjálfsvarnarlist TAEK KWON DU eða DO? Má segja að hann hafi farið hreint á kostum í gær og sparkað í mann og annan með þeim árangri að undrun sætti og steinlá hann í sumum tilfellum sjálfur í gólfinu þó ekki hrykki mótherjinn mikið við, slík var baráttugleðin í drengnum. Ég mun reyna að birta myndir af árangri XRW eftir því sem komið verður við. þ.e.a.s þegar ég læri að setja inn myndir á þessa blogg síðu ;-)

En af öðru fyrr á þessu ári ösnuðumst ég og XRW títtnefnur að heita á Pál nokkurn Gíraffa Guðbrandsson ókeypist flug og miða á Liverpoolleik í apríl næstkomandi, ef hann yrði reyklaus þangað til. Og er nú illt í efni, drengurinn virðist vera að standa sig í þessu veðmáli og útlit fyrir að við þurfum að punga út miklum fjárhæðum nú í apríl. Ég vil því biðja alla þá sem þekkja The Giraf að gefa honum sígarettu og ekki væri verra ef næðust myndir af athæfinu. En þess ber að geta að kappinn er nú staddur hér á klakanum í smá fríi frá Námi sínu í Danmörku. Er því tilvalið að sem flestir nálgist hann og bjóði honum smók á meðan hann er á klakanum.

Er svo ekki farinn að koma tími á eins og eitt gott spilerí ????

Skál og lifið heil.

Margur telur mig svið!

Ofur tissjú skammtarar

2005-09-23T10:50:00.000Z

Sælinú!

Þar sem enginn annar virðist skrifa inn á þessa síðu verð ég víst að halda uppi fjörinu.
Hér í VR-II eru komnir sjálvirkir tissjú skammtarar á klósettin. Þeir virka þannig að maður veifar hendinni fyrir framan þá og hókus pókus hann ælir út úr sér passlega stórum tissjúskammti til að þurrka svo sem eins og tvær staðal stærðar hendur. Ég veit svo sem ekki hvað var að gömlu þurrkustöndunum þar sem maður togaði bara í og fékk þá eins og eina þurrku og ef maður var mjög blautur gat maður togað aftur og fengið aðra. Ég er farinn að hallast að því að menn vilji setja rafmagnsskynjaraelement í alla skapaða hluti bara út af því að það er hægt sama hvort það skilar einhverju eða ekki.

Markmiðinu er náð, Einar er orðin 100 kg

2005-09-22T14:32:00.000Z

Í síðustu viku ákvað ég að vömbin væri orðinn í það stærsta og keypti mér kort í Háskólaræktina. Þar hef ég verið duglegri en ég hef nokkurn tíma verið áður og hef mætt daglega og svitnað blóði.

Eini árangurinn af þessari vitleysu er að í gær er ég steig á vigtina blikkuðu öll aðvörunarljós, Einar var kominn í þriggja stafa tölu. Ég hefi áður komist hættulega nærri markmiðinu en þó hæst farið 99,5 kg þegar ég hef verið vigtaður.

Þrátt fyrir að þetta hafi verið yfirvofandi um langan tíma þá var þetta mér mikið áfall og sá ég fram að ef ekki yrði gripið hraustlega í taumana yrði ég fyrr en varir orðinn á stærð við föður minn, þeir sem til þekkja vita að hann er stór maður.

Ég hef því ákveðið að nú gangi þetta ekki lengur. Ég ætla að fara að drekka Léttmjólk. Palli ætti að vita manna best að þetta er mér ekki auðveld ákvörðun, stríðir í raun gegn grundvallarlífsviðhorfi mínu.

Auk Léttmólkurinnar ætla ég að hætta að borða nammi nema á laugardögum og borða meira grænmeti. Þar að auki mun ég halda áfram spriklinu og fara í Tæ Kvon Dó með Himma á miðvikudögum og föstudögum.

Ef þetta dugir ekki til að koma mér niður í viðunandi þyngdir þá gefst ég upp og kaupi mér LazyBoy og sest fyrir fram sjónvarpið með Kók og Prins og Franskar sem synda í Kokteilsósu og margt fleira óhollt og fer að njóta þess að hafa vinalegt lag utan á mér og hætti að hlusta á alla þessa vitleysu um að feitt sé ekki fallegt.

Varðandi spilamennskuna þá þýðir þetta aðeins að ég mun herja á ykkur af enn meiri þunga. Árangri síðasta spilakvelds verður fylgt eftir.

Úrslit liggja fyrir!

2005-09-08T09:57:00.000Z

Þá er það ljóst, Garon hefur verið felldur í fyrsta skipti. Einar sýndi loksins hvað í honum býr er hann lagði Gunnar Aron og Hilmar að velli í æsispennandi viðureign í gærkveldi.

Taugaspennan lá í loftinu þegar spilakvöldið átti að hefjast klukkan 8. Hilmar mætti á sínum fjallabíl en virtist ekki alveg vita hvort hann ætti að voga sér inn heldur sat í bíl sínum og þóttist tala í símann í um tíu mínútur. Aron tilkynnti að hann yrði seinn fyrir, hefur eflaust þurft að telja í sig kjark.
Hilmar mætti með poka af Nóa Kroppi og tvo kalda að venju og Aron með poka af ágætis snakki sem ég kann ekki að nefna. Á boðstólum húsráðanda var Appelsín og Kók en þar sem Hilmar hélt sig við ölið þá var Appelsínið látið duga.

En þá að leiknum. Strax í byrjun tryggði Aron sér Ástralíu sem hann hélt allt spilið utan einnar árásar Himma um miðbik spilsins sem var hrundið strax í næstu umferð. Hilmar náði Ameríkunum báðum en náði aldrei að halda þeirri Nyrðri heila umferð en fékk að hafa þá syðri í friði allt spilið. Einar náði undir sig Afríku en fékk ekki mikinn frið þar og var Aron með sérstaklega mikið vesen í því sambandi.
Í eitt skiptið sem Hilmar hafði náð allri Norður-Ameríku á sitt vald fékk Einar þrjár fallbyssur og skundaði með her sinn inn í Alaska og tók einnig Nordvestterretoriet og skildi þar eftir þónokkurn liðsafla. Þetta olli því að Hilmar sá sér þann kost vænstan að gefast upp á þeirri heimsálfu og tók ábendingu Einars um að snúa sér frekar að Evrópu.
Á meðan á þessu stóð var Aron farinn að gera sig ansi breiðan í Asíu og óttaðist Einar á tímabili að Verkefni Arons væri að ná Ástralíu og Asíu en seinna kom á daginn að svo var ekki.
Er svo kom að Einari átti Aron Asíu og Ástralíu og Hilmar Suður-Ameríku og Evrópu á meðan hann sjálfur átti aðeins Afríku. Átti Einar á þessum tímapunkti þrjú spjöld sem öll voru tindátar sem gefur aðeins fjóra aukakalla. Staða Einars virtist því ekki vera sterk en hann nýtti sér aðstæður til hins ítrasta skipti spjöldunum og setti alla sína kalla á Norður-Ameríku þar sem Hilmar var orðin veikur fyrir eftir að hann snéri athygli sinni í átt til Evrópu. Öllum varð þá ljóst að Verkefni Einars var að ná Afríku og Norður-Ameríku.
Einar hóf stórsókn og lagði í snarhasti undir sig öllu lönd álfunnar nema Mellemamerika en þar hafði Hilmar álitlegan her til umráða. Fóru þá í hönd nokkur taugatrekkjandi teningaköst þar sem Einar hafði betur að lokum og hafði þá lokið verkefni sínu og þar með unnið verðskuldaðan sigur. Ljóst má þó vera að hefði Einari ekki tekist ætlunaverk sitt í þessari umferð þá hefði framtíð hans verið í mikilli hættu.
Vill Einar þakka sigur sinn því að Palli var ekki með þar sem hann hefur þann sið að beita sér af öllu afli gegn Einari um leið og hann telur hann hafa gert eitthvað á sinn hlut, og virðist bræði hans beinast í meira mæli gegn Einari en öðrum.

Þakka þeim er hlýddu

Spilakvöld boðað

2005-08-31T18:03:00.000Z

Sælir bræður sem enn hafa ekki ákveðið að yfirgefa okkar átkæra land. Ég var að spá hvort áhugi væri fyrir að halda spilakvöld einhvern daginn í næstu viku. Ég er reyndar búinn að tala við Himma og hann er geim alla daga nema mánudag. Þetta er því í raun allt undir þér komið Aron. Spilastaður mun vera heimili mitt.

Aðeins hérna smá...

2005-06-19T21:24:00.000Z

Ég var orðinn svo leiður á þessari páskamynd þannig að ég ákvað að semja ljóð:

Komdu að spila Steingrímur,
spilaðu eins og óður.
Við Steingrímur rímar Hallgrímur,
séreignarlífeyrissjóður...

Hmmmm...?

Gleðilega páska Steingrímar

2005-03-23T22:30:00.000Z

Gunnar Aron Ólason

2005-03-08T17:43:00.000Z

Mig langar bara að birta hérna mynd af Aroni sem var tekin af honum við komuna á spilakvöld hjá Einari í gær.

Ég vil einnig við þetta tækifæri reka af mér það slyðruorð að ég sé tapsár, það er bara ekki satt, ég er bara óheppinn!

Kvöld spila er gær í var

2005-03-08T17:35:00.000Z

Hvað á maður að segja? Ég vann aftur!

2005-03-07T02:16:00.000Z

Garon er tilbúinn!

Boðun á spilakvöld

2005-03-02T16:10:00.000Z

Sælir reglubræður!

Ætla ég nú að kalla saman fund í hinni heilögu Steingrímsreglu næstkomandi mánudagskvöld klukkan 8. Vil ég þannig reka af mér það slyðruorð sem á mig var ómaklega klínt eftir seinasta spilakvöld. Augljóst er að til þess var boðað með of skömmum fyrirvara. Ef þið hafið einhverjar athugasemdir við þetta, vinsamlegast komið þeim á framfæri hér í til þess gerðum commenta tengli.

Virðingarfyllst
Einar E. Halldórsson

Innlegg

2005-03-01T14:33:00.000Z

Sælir Steingrímar, er ekkert nýtt í'essu?

Spilakvöld # 4 - Úrslit

2005-02-19T15:56:00.000Z

Já það fór eins og flestir vissu, Garon reið feitum hestum yfir álfur og lönd. Ég sigraði semsagt andstæðinga mína sem voru að þessu sinni Páll formaður og Hilmar bjórmaður. Einar afboðaði áður boðaða komu sína og hafði formaðurinn það á orði að þetta hlyti að fara beint fyrir aganefndina sem starfar mjög leynilega því að enginn veit hverjir eru nefndarmenn og enginn hefur séð til funda hennar. Einar er því í mjög vondum málum og gæti átt von á því að svartur, númerslaus sendibíll aki hratt upp að honum þar sem hann er að rogast með innkaupapoka heim úr kjörbúðinni fulla af hveiti og lyftidufti, menn hrifsi hann inn í bílinn og taki hann til gjörðar.

En það breytir því ekki að ég vann rimmuna. Var ég búinn að minnast á það? Jæja ef ég var ekki búinn að því þá geri ég það hér með. Ég fékk missionið að ná Ástralíu og Norður-Ameríku. Ég náði að leyna því nokkuð vel því að andstæðingar mínir svömluðu saklausir á feigðarósi allt fram á síðustu stundu. Himmi var mér ansi erfiður ljár í þúfu í Suður-Asíu og Ástralíu er ég herjaði þar. Eftir að ég náði því svæði af honum lét hann reiði sína bitna á Evrópu sem ég hafði slegið eign minni á nánast frá byrjun. But little did he know því að þegar hann gerði mér þessa skráveifu var ég að sjá fyrir endann á missjoninu og kom það því ekki að eins mikilli sök eins og hann óskaði. Palli var nokkuð veikur framan af en var svo sannarlega að vinna sig upp þegar síðasti spretturinn var að fara í hönd. Ég held að ef ég hefði ekki klárað þetta mission mitt í þeirri umferð sem ég gerði það þá væri einhver annar en ég að skrifa sigurpistil. Og þó, hver veit?

Góðar stundir.

Ég spyr

2005-02-16T16:13:00.000Z

Hvað er að frétta pungar? Ég var að frétta það að ég er einn heima í kvöld, eigum við að taka rimmu?

Spilakvöld # 3 Úrslit!

2005-02-16T12:25:00.000Z

Spilakvöld # 3 var haldið hátíðlega þann 11 febrúar og mjög stundvíslega þ.e.a.s. kl 20:30 heima hjá Formanninum. Þar voru mættir Formaðurinn (ótrúlegt en satt), Himmz á slaginu en Einar mætti svo 20 mín seinna án allra húsmæðralegra tilburða. þ.e. enginn heimabakstur í

þetta skiptið og upplifði mikla skömm og ávítur fyrir þann dónaskap. Aron er hinsvegar ekki enn mættur!

Spilað var hið ágæta spil Risk og sett var heimsmet í spilaklúbbi Steingríms með því að spila tvær rimmur af þeim hressandi leik sama kveldið. Það vildi nebbnilega svo vel til að rétt eftir að spilið var byrjað hafði undirritaður náð takmarki sínu sem var s-amerika og asía (að mig minnir) og þar af leiðandi slegið mótherja sína þvílíkt utanundir með herkænsku sinni og útaf laginu að annað eins hefur ekki sést. Eftir að persónulegri teningaárás formannsins (sem gerði álíka mikinn skaða og köst hans í leiknum sjálfum = No Damage) á sigurvegarann var lokið og ró farinn að færast yfir mannskapinn var afráðið að grípa í aðra rimmu sem endaði á sama hátt með því að undirritaður lagði hver landið eftir öðru undir fót og uppskar Ástralíu ( sem fór alveg með formanninn enda hans mottó að eiga þann landskika alltaf ávallt og allstaðar), Afríku og Asíu sem dugði til sigurs. Þó seinni rimman stæði aðeins lengur yfir og var í heildina litið jafnari þá sáu grey drengirnir aldrei til sólar og vissu yfirleitt ekkert hvað þeir væru að reyna eða ættu að gera í spilinu. Það er Því nokkuð ljóst að HERSHÖFÐINGI VIKUNNAR ER HIMMZ. OG Fór Hann Létt MEð ÞAð. Ég lýsi hér með eftir smá challenge frá spilafélögum mínu á komandi spilakvöldum því þetta fer að verða leiðinlegt til lengdar að vinna alltaf ;´)

Lifið Heil

Skál

Nýtt af nálinni...þannig séð

2005-02-08T16:20:00.000Z

Setti inn annað commentakerfi. Aðallega vegna þess að mér finnst hitt ömurlegt, tók það þó ekki út. Sjáum til hvernig þetta þróast.

Úrslit spilakvölds #2

2005-02-07T18:28:00.000Z

Jájájájá, ég er Riskmeistari vikunnar og hafði ekki mikið fyrir því. 4 heiðursmenn mættu en formaðurinn beið mikinn álitshnekki áður en kvöldið byrjaði formlega með því að mæta, ekki of seint, heldur gjööörsamlega ólíðandi seint!!! En hvað um það, þessu er ekki viðbjargandi. Einar bjargaði því sem bjarga varð með því að koma með vínarbrauð.

Við spiluðum semsagt Risk og ég fékk það mission að ná Suður-Ameríku, Evrópu og svo þriðju heimsálfu að eigin vali. Himmi varð fyrir því óhappi að verða á vegi mínum og hlaut hann mikinn skaða af og náði sér eiginlega aldrei eftir rimmu okkar í byrjun spils. Páll hélt uppteknum hætti og sló eign sinni á Ástralíu í upphafi spils og einbeitti sér að því að halda þeirri álfu hvað sem á dundi. Að eiga Ástralíu var eiginlega það eina sem hann gerði allt spilið, hann var fyrst að ná sér á eitthvert strik þegar ég var um það bil að klára missionið mitt. Einar fékk að eigin sögn lélega gjöf í byrjun og urðu hans örlög að reyna að eignast Evrópu sem mig minnir að hann hafi ekki náð að halda henni eina einustu umferð þannig að hann var aldrei nein veruleg ógn.

Læt ég þetta duga að sinni en minni fólk að sjálfsögðu á að endurnýja áður en það verður um seinan.

Spilkvöld #2

2005-02-02T11:39:00.000Z

Það gleður mig að tilkynna það að commenta kerfið er nú aftur virkt þannig að við getum nú ásamt gestum og gangandi veitt okkar álit á þeim póstum sem hér eru birtir.

Næsta mál á dagskrá er þá annað spilakvöld klúbbsins. Eftir að hafa rætt við alla meðlimi á höfuðborgarsvæðinu hafa tekist samningar um að hittast annað kvöld, þ.e.a.s. fimmtudagskvöld. Mun hittingur sá eiga sér stað heima hjá mér í Drápuhlíðinni. Þar sem ég er í fullu starfi sem þjálfari hins óviðjafnanlega 1. flokks Breiðabliks (allir kíkja þar á umfjallanir mínar um leikina) í körfubolta mun spilakvöldið hefjast ca. 21:20 þar sem útihlaup og þrekæfingar 1. flokksins hittast á sama tíma. Fyrrgreindar reglur um drykkjarföng og meðlæti verða í gildi og snyrtilegs klæðnaðs er krafist þar sem spiladúkurinn sem klúbburinn fjárfesti í fyrir nokkru verður vígður opinberlega í fyrsta sinn.

Gott væri ef meðlimir myndu formlega boða komu sína með þar til gerðum "commentum" til að draga úr símakostnaði klúbbfélaga og raunprófa að kerfið virki.

Einnig vil ég minna alla sem kíkja á þessa síðu að skrifa í gestabókina sem er staðsett fyrir neðan könnunina. Þar stendur til skiptis "Click here" sem útleggst á íslensku sem "Ýtið hér" og "Sign my guestbook" sem er einmitt útlenska sem þýðir "Skrifið í gestabókina mína".

Páll Guðbrandsson
Formaður Spilaklúbbsins Steingríms

Fyrsta spilakvöldið

2005-01-31T11:35:00.000Z

Síðastliðið fimmtudagskvöld fór fram fyrsta spilakvöld Spilaklúbbsins Steingríms. Fór það fram á heimili undirritaðs. Tókst kvöldið með miklum ágætum þrátt fyrir að ekki hafi verið full mæting. Palli og Himmi mættu vígreifir til leiks. Palli reyndar frekar seint þar sem hann stóð í einhverjum klósettpappírsbisness og mætti á sendiferðabíl stútfullum af skeini. Ekki var hann fyrr kominn inn úr dyrunum en reynt var að koma upp á mann 300.000 rúllum af skeinipappír, eldhúsrúllum og servéttum. Eftir að mér tókst fimlega að leiða hjá mér sölumennskuna var hafist handa við spilamennskuna.
Spilið sem varð fyrir valinu var Risk og byrjaði minns frekar illa, lenti milli steins og sleggju ef svo mætti segja. Var um tíma svo komið að aðrir spilarar voru nánast búnir að afskrifa mig. Himmi náði strax góðum tökum á Afríku og Palli á Ástralíu sem hann hafði nota bene lýst yfir fyrir spilið að hann ætlaði að eigna sér og það væri best fyrir aðra að vera ekki að þvælast fyrir. Lá reyndar við grátri hjá Páli þegar Hilmar gerði fífldjarfa árás og hertók Ástralíu eins og hún leggur sig. Á meðan á átökum þeirra stóð stækkaði ég mitt litla veldi svo lítið bar á og náði undir mig Evrópu og hélt henni nokkra stund eða þar til Palli í asnaskap sínum réðst á mig og gerði þar með út um allar vonir um að gera Hilmari nokkra skráveifu en ítök hans á suðurhvelinu voru orðin ansi mikil. Hilmar réðst svo inn í N-Ameríku sem Palli hafði náð nokkrum tökum á og vildi Palli algerlega kenna teningunum um að það hafi tekist. Sjá mátti gufustrókanna standa út úr eyrum Páls þegar fór að líða á þá orustu. Þegar hér var komið sögu hafði ég safnað öllum mínum herjum í S-Evrópu og hugðist gera örvæntingafulla tilraun til að draga úr herafla Hilmars með því að ráðast inn í Afríku. Hann var hinsvegar fyrri til og réðst á mína menn og er ekki hægt að segja annað en að hann hafi beðið niðurlægjandi ósigur.
Varð það til að kveikja von í brjósti okkar Palla um að við gætum jafnvel sigrast á gulu ógninni. Réðst ég þá á Hilmar og tók af honum lönd í Afríku og S-Ameríku og virtist heimsveldi hans þá að hruni komið. En áður en við náðum að ganga milli bols og höfuðs á Hilmari tókst honum að klára sitt verkefni sem var að útrýma Páli.
Var ég nokkuð sáttur við mína frammistöðu undir lokin eftir hræðilega byrjun. Vil ég meina að Páll og Hilmar hafi tekið sig saman um að ráðast alltaf gegn mér í upphafi spils til að ég endurtaki ekki leikinn frá því er við fyrst spiluðum Risk, en þá eins og flestir muna valtaði ég yfir þá bræður. Bíð ég spenntur eftir næsta spilakvöldi og geri ég ráð fyrir að aftur verði spilað Risk því ég og Palli eigum harma að efna eftir þetta fyrsta kvöld og skora ég á aðra meðlimi klúbbsins að láta sig ekki vanta þá.

Magnað er það!

2005-01-27T09:59:00.000Z

Einhvern Blogmóri komst í tölvuna mína og fjarlægði commentin, en ég held að þau séu komin aftur núna þannig að þá er bara að commenta á þennan póst með mætingu á spilakvöld í kvöld.

Neibb hafðist ekki sökum tímaleysis, en verður lagað við fyrsta tækifæri.

Fyrsta spilakvöldið

2005-01-26T16:51:00.000Z

Á morgun, fimmtudag verður haldið fyrsta spilakvöld Steingríms. Fer það fram á heimili mínu og hefst klukkan 9 stundvíslega. Eins og hin óformlega samþykktu lög klúbbsins segja til um mun ég sjá fyrir gosi en öðrum limum er ætlað að koma með einhvers konar léttar veitingar að eigin vali. Ef menn vilja bjór verða þeir hins vegar að koma með hann sjálfir.
Vona ég að allir mæti og þetta verði kvöld til að muna eftir.

Kveðja frá Hrísey

2005-01-25T13:37:00.000Z

Sælir félagar. Ég og aðrar skepnur höfum það bærilegt hér í Hrísey, fyrir utan að allt fuglalíf hér í eynni virðist hafa hrunið eftir komu mína af einhverjum óskliljanlegum ástæðum. Ég býst fastlega við að vera orðinn laus úr prísundinni fyrir fimmtudags aftan og mun því mæta svalur eins og hvalur til stofnfundsins ógurlega (þ.e.a.s ef Norðuleiðarútan stenst áætlun). Einnig renndi ég yfir Lög og ólög comrads Einars og styð þau heilshugar en þó með fyrirvara um breytingar hvar og hvenær sem er á meðan að mannskapurinn er með rænu. Um helgina varð ég fyrir þeirri frábæru lífsreynslu að verða vitni að Liverpool ósigri, og síðast en ekki síst stórsigri stórliðs Rauða djöflanna, þetta gladdi mitt litla hjarta gífurlega hér í einangrunar klefanum og jafnvel sólin tók sig til og skein í tilefni dagsins beint í augun á mér með tilheyrandi sólbruna og sjóntruflunum sem fylgdu í kjölfarið.

Kv Djúser í einangrun

Skál

Helgi hinna misjöfnu úrslita

2005-01-24T11:33:00.000Z

Helgin hófst í Smáranum, meistaraflokkur vann ÍA (varð fyrir vonbrigðum með vin minn Alexander Ermolinskí) jákvæð úrslit, vann Pálma í 3-stiga keppni, 5 af 5 oní í bráðabana, jákvæð úrslit það, unnum Skallgrím í Borganesi með einu stigi úr víti eftir að leiktíminn var útrunninn, afar jákvætt, af þessum lestri að dæma mætti halda að ég hafi átt bara ansi góða helgi, en síðan fær maður úrslitin úr Liverpool leiknum og þá strokast öll góð úrslit út. Þetta er óþolandi hvað þetta lið getur verið mistækt. Alveg gersamlega óþolandi, það er eins gott að þeir nái 4. sætinu og verði búnir að taka sig saman í andlitinu næsta vetur þegar maður fer á Anfield (vonandi). Hlýtur að kosta skít á priki svona Anfield ferð í Köben. Fokk it nenni ekki að væla yfir þessu.

Annars langar mig að minnast á atvik sem ég varð vitni af um helgina og ég verð að segja að ég man ekki hvenær ég hló jafn mikið seinast. Á föstudagskvöld fór ég niðrí bæ með þeim Hjallabræðrum Pálma og Dodda. Við kíktum á Gaukinn þar sem var 18 ára aldurstakmark! Afgreiðslustúlkan tjáði mér að þrátt fyrir áhyggjur mínar um annað þá væri þetta alveg löglegt þar sem krakkarnir mættu ekki kaupa á barnum, my ass!!!, þetta er ekkert annað en unglingadrykkja, jæja skítt með það hvort þetta sé rétt eða rangt siðferðislega, ég er sennilega bara orðinn svona gamall, en það sem skiptir máli er að þetta eyðileggur algerlega staðinn fyrir mér! Við ætluðum að fara á Gaukinn þar sem alltaf er hægt að tylla sér í góðu tómi með öl við hönd og taka nokkra pool leiki á efri hæðinni. Það fór fjarri að við gætum það á föstudaginn. Þegar við loksins komumst inn eftir að hafa fylgst með ungri stúlku reyna að limlesta dyraverðina sem höfðu tekið af henni falsað skliríki (það þurfti 3 verði til að snúa hana niður) þá tók ekki betra við, það var bókstaflega maður við mann á allri efri hæðinni, allt einhver kids og einhverskonar andlitmálning í gangi við innganginn, þetta var eins og að koma inn á diskó á Ibiza (sem er ekki jákvætt þegar maður er að leita eftir rólegheita stemmningu yfir nokkrum pool leikjum) enda vorum við félagarnir fljótir að snúa við og kíktum á Roadhouse (áður Kapital, áður Thomsen) það var ekki alveg að gera sig enda 6 gestir inni (að okkur meðtöldum) og músíkin þanin svo hátt að blæddi úr eyrum viðstaddra. Æjá, best að fara að koma sér að sögunni fyndnu, jæja eftir að hafa kíkt á Ara snerum við aftur á Gaukinn til að hitta Max og Luke. Max er sá mesti útlendingasegull sem til er. Þrátt fyrir að hann hafi verið nánast ómálga af ölvun var hann búinn að kynnast einhverjum 6 útlendingum, þar af einum Glasgowbúa (sem b.t.w. hélt hvorki með Rangers eða Celtic heldur Iverness) sem settist hjá mér og Luke á neðri hæðinni, aðrir voru á einhverjum þvælingi um staðinn. En meðan við erum að spjalla þarna kemur að ung stúlka vel við skál sem ætlar að kveikja sér í rettu á sprittkerti sem stóð á borðinu. Hún beygði sig niður og á meðan hún var að reyna að samhæfa staðsetningu sígarettunnar og logans frá kertinu ýtti Glasgow ofaná hausinn á henni þannig að sígarettan sem var að verða tilbúinn til reykinga dýfðist ofaní vaxið. Eins og þið getið ímyndað ykkur varð daman ekki par ánægð með atburðarásina og reisti sig upp og starði á mig leitandi hatursfullu augnaráði og síðan á Skotann og einmitt meðan hún starði á mig kom Pálmi að borðinu og stóð fyrir aftan hana og eftir að hún hafði rannsakað mig og Skotann sneri hún sér við........tók þá ákvörðun að sá seki væri fundinn.......dúndraði í brjóstið á Pálma.........las honum pistilinn með þeim hætti að ekki verður haft eftir hér og strunsaði síðan burt! Ok, svipurinn á Pálma greyinu eftir að hún fór var ómetanlegur. Það mætti setja hann í orðtakabók undir "veit ekki hvaðan á sig stóð veðrið"! Þetta var svo fyndið að það var ekki laust við að ég brynnti músum. Það má alveg segja að þetta hafi bjargað helginni fyrir mér.

Einnig er að lokum vert að minnast á það fyrir áhugasama að stofnfundur Spilaklúbbsins fór ekki fram um helgina eins og ráðgert var, en Hilmar lagðist í fuglaflensu og var sendur til Hríseyjar í sóttkví og ekki er von á honum fyrr en á fimmtudaginn en stefnan hefur verið sett á að hafa hitting þá.

ps. Ef það er til hákarl heima hjá einhverjum látið mig vita því mér hefur verið tilkynnt að ef ég ætli að koma með þannig illa lyktandi viðbjóð heim muni verða búið að skipta um skrá á hurðinni.

2005-01-20T14:18:00.000Z

Steingrímur?

Þetta er alltsvo myndin sem átti að birtast með fyrstu greininni, djöfull er ég fljótur að læra!

Þetta er verndari Spilaklúbbsins Steingríms, sjálfur Tony Clifton og þess má geta að þetta er hinn eini sanni Tony Clifton, þ.e.a.s. þetta er ekki Jim Carrey í gervi Tony Clifton heldur er þetta mynd af sjálfum Andy Kaufman sem Tony Clifton, svona var gervið gott í alvörunni! Kaufman var snillingur. En Tony Clifton var meiri snillingur og hefur hér með verið skipaður verndari Steingríms og hlýtur heiðursnafnbótina Steingrímur. Þeir sem ekki vita hver Tony Clifton er eru vinsamlega beðnir um að skríða út úr helli sínum, út á Bónusvídeó (eða aðra sambærilega myndbandaleigu) og leigja Man on the Moon sem er snilld!

Lög Spilaklúbbsins Steingríms

2005-01-20T13:38:00.000Z

Ég ætla hér að koma með drög að lögum fyrir spilaklúbbinn Steingrím, þetta er einungis mín hugmynd að lögum og er því öllum frjálst að koma með breytingartillögur og aðrar tillögur ef þeim sýnist svo, líka mega menn koma með tillögu um að engin lög verði sett og allsherjar stjórnleysi ríki innan Spilaklúbbsins. En hér koma mínar hugmyndir.

Stofnsáttmáli Spilaklúbbsins Steingríms (SSS)

Markmið Spilaklúbbsins Steingríms er að treysta vináttubönd meðlima með heilbrigðri ástundun hinna ýmsustu spila. Spil þessi skulu eiga það sammerkt að þroska hugann og veita útrás fyrir hinar miklu gáfur sem innan spilaklúbbsins þrífast.
Stefnt er að því að spilakvöld verði ekki haldin sjaldnar en einu sinni í mánuði og munu menn skiptast á að bera ábyrgð á skipulagningu kvöldanna. Sá sem ábyrgð ber á skipulagningunni útvegar húsnæði og kaupir óáfeng drykkjarföng. Hinir skulu allir koma með eitthvað ætilegt og er það undir þeim sjálfum komið hvað það er. Þeir sem vilja neyta áfengra drykkja útvega þá sjálfir.
Páll Guðbrandsson verður æviráðinn formaður Spilaklúbbsins Steingríms.
Árlega skal kosinn gjaldkeri sem fer með stjórn hinna digru sjóða klúbbsins. Páll Guðbrandsson verður ekki gjaldgengur þar sem hann myndi eyða öllum peningunum í fyllirí.
Meðlimir greiða hóflegt mánaðargjald, sem standa á straum af hinni árlegu árshátíð félagsins auk hugsanlega öðrum viðburðum. (Ég var að hugsa kannski 500 kall)
Áfengisneysla á samkomum Klúbbsins verður með öllu heimil, svo framarlega sem menn verða sér ekki til ævarandi minnkunar.
Til að nýr meðlimur verði samþykktur í hópinn þarf samþykki allra gildra meðlima.
Stofnmeðlimir Spilaklúbbsins Steingríms eru Páll Guðbrandsson, Einar Egill Halldórsson, Hilmar Hilmarsson, Gunnlaugur Róbertsson og Gunnar Aron Ólason.

P.S. Hver er djúser

Wunderbar

2005-01-20T13:21:00.000Z

Já ég tek undir með síðasta ræðumanni.
Og tel ég að Spilaklúbburinn Steingrímur muni verða að heimsveldi
með ófyrirsjáanlegum afleiðingum, hver man t.d. ekki eftir fightclub!
Ég vil óska sjálfum mér og öðrum félögum til hamingju með þetta frábæra
framtak til spilamenningarinnar.

Guðbrandssonurinn fær hér mitt atkvæði sem æviráðinn forystusauður þessa Klúbbs.

Hann lengi lifi.

Skál

Til hamingju!

2005-01-20T13:04:00.000Z

Nú stefnir allt í Spilaklúbburinn Steingrímur verði formlega stofnaður næstkomandi föstudagskvöld. Klúbburinn hefur verið í burðarliðnum í nokkurn tíma núna og því við hæfi að óska öllum aðstandendum hans til hamingju nú þegar hin merku tímamót virðast óumflýjanleg. Leitt er þó að hafið hefur lokkað í burtu hann Gulla, einn af stofnmeðlimum Klúbbsins en mun vonandi skila honum aftur með vorinu.
Legg ég til að Páll Guðbrandsson, aðalhvatamaðurinn að stofnun þessa félags verði æviráðinn sem formaður Félagsins. Hann hefur verið óstöðvandi í viðleitni sinni til að koma þessu á fót og á heiður skilið fyrir þessa glæsilegu heimasíðu sem hann hefur komið upp hér.

Vil ég að lokum hrópa ferfallt húrra fyrir Spilaklúbbinum Steingrími.

Húrra, Húrra, Húrra, Húrra.

Fyrstu skrefin

2005-01-20T11:54:00.000Z

Jæja þá stígur maður fyrstu skrefin í bloggheimi alnetsins. "Sjá síða er fædd, sem mun koma til að dæma lifendur og dauða!" segir í guðspjallinu. En þessi skref mín inn í gervihnattaöld eru ekki ætluð til eigin framdráttar, heldur til að auka hróður og samskipti innan Spilaklúbbsins Steingríms sem við félagarnir höfum haft í farvatninu síðustu mánuði. Upphaflega vorum við 4 sem unnum að hugmyndinni sem varð til vegna þess hve gríðarlega vel kærustur þriggja okkar virtust skemmta sér í sínum svokölluðu "saumaklúbbum".

Forviða reyndum við að skilja hvað gengi á í þessum klúbbum, var saumað? hvernig kom allur þessi matur til? Voru saumuð ílát undir matinn? hvað gekk þarna á? Eftir að hafa reynt ítrekað að komast til botns í þessu tók ég mig til og spurði mína ektakonu Guðnýju nánar útí þetta. Eftir að hafa meðtekið sannleikann bak við saumaklúbbana og rætt hann við Einar var tekin ákvörðun um að stofna Spilaklúbb til að félagarnir myndu örugglega hittast reglulega. Enda eru menn komnir til vits og ára........jah alla vega ára og orðið erfiðara að hittast allir.

Þannig kom hugmyndin að Steingrími til. Upphaflega voru 4 á bakvið þetta: ég, Einar, Gulli og Himmi. Síðan tekur Gulli skyndilega upp á því að skella sér á sjó á Hornafirði þar sem hann kúrir næturlangt í faðmi tengdaföður síns og voru þá góð ráð dýr og Gunnari Aron (þekktur sem Aron) boðin innganga. Það eru því 5 félagar sem stendur og markmiðið er að hittast visst oft í mánuði og spila einhver spil hæfandi jafn gáfuðum mönnum og hér eru saman komnir. Þessi síða verður því málgagn Spilaklúbbsins Steingríms auk þess sem meðlimir hans munu jafnvel viðra skoðanir sínar um menn og málefni, bændur og búalið auk alls þess sem þeim kann að liggja á hjarta. Þetta verður því einnig einskonar bloggsíða fyrir okkur í hópnum sem ekki eru færir um að halda úti slíkri síðu uppá okkar einsdæmi auk þess sem tilkynningar um og helstu úrslit af spilakvöldum okkar verða birt.

Fylgist því með þessu næsta stóra fyrirbæri sem er að renna úr vör og hefur þegar verið líkt við .com sprengjuna !

Ekki er hægt að lýsa Spilaklúbbnum Steingrími í orðum, en ef það er hægt í myndmáli þá væri hann c.a. svona.......